Um verkefnin

Þjónustuteymið hóf störf í júní 2024 og starfar samkvæmt lögum um framkvæmdanefnd vegna jarðhræringa í Grindavíkurbæ.

Frá og með 1. desember 2025 gátu Grindvíkingar ekki lengur leitað til þjónustuteymis Grindavíkurnefndar, sem markaði tímamót í þjónustuviðbrögðum stjórnvalda. Þjónustan færðist þá alfarið til þeirra sveitarfélaga þar sem Grindvíkingar eru búsettir. Eftir breytingar á starfsemi þjónustuteymisins hefur hlutverk þess nú takmarkast við að sinna þeim lögbundnu verkefnum sem Grindavíkurbær hefur falið teyminu og annast framkvæmd rýnihópaverkefnis sem ætlað er að greina reynslu Grindvíkinga, kortleggja þarfir þeirra og varpa ljósi á forsendur frekari stefnumótunar.

Í kjölfar breytinga á starfsemi þjónustuteymisins hefur jafnframt hafist formlegt samtal við þau sveitarfélög sem tóku á móti stærstum hluta Grindvíkinga, með það að markmiði að meta stöðuna, greina áskoranir og leggja mat á hvort þörf sé á frekari aðlögun og stuðningi við móttökusveitarfélögin í kjölfar jarðhræringanna.

• Hafa samband í síma 545 0200

• Senda tölvupóst á radgjod@grn.is

  
  

  
  

Þjónustuteymið vinnur nú að umfangsmiklu rannsóknarverkefni með það að markmiði að greina reynslu, líðan og stöðu Grindvíkinga eftir rýminguna og tryggja að lærdómurinn nýtist við mótun framtíðaraðgerða og uppbyggingu samfélagsins. Verkefnið felur í sér spurningakannanir, rýnihópa, greiningu á heilsu, félags- og efnahagslegum aðstæðum og kortlagningu framtíðaráforma Grindavíkinga.

Rýnihópar gegna þar lykilhlutverki, enda veita þeir dýpri innsýn í viðhorf, væntingar og reynslu ólíkra hópa Grindvíkinga. Þessi nálgun gerir kleift að varpa ljósi á lífsskilyrði, öryggi, tengsl við staðinn og aðra þætti sem skipta máli. Slík aðferðafræði stuðlar jafnframt að virkri hlustun í öruggu umhverfi og getur verið mikilvægur þáttur í bataferli þátttakenda.

Niðurstöður verkefnisins munu mynda kerfisbundinn og gagnadrifinn grunn fyrir áframhaldandi stefnumótun stjórnvalda. Framundan er að nýta niðurstöður rannsóknarverkefnisins til að tryggja að endurreisn samfélagsins byggi á skýrri þekkingu, gagnsæi og samhæfðum aðgerðum.

Farsæld barna eða samþætting þjónustu í þágu farsældar barna – byggir á lögum sem gilda fyrir öll sveitarfélög, stofnanir og þjónustuveitendur sem starfa með börnum og ungmennum um allt land.

Lögin, sem oft eru nefnd farsældarlögin eða lög um samþættingu þjónustu í þágu farsældar barna, hafa það markmið að efla þjónustu við börn og fjölskyldur með því að stuðla að nánu samstarfi þeirra aðila sem koma að málefnum barna.

Með lögunum er tryggt að börn og foreldrar fái viðeigandi aðstoð á réttum tíma og frá réttum aðilum. Þegar þjónustan er tengd saman og unnið er í sameiningu að farsæld barna verður auðveldara fyrir fjölskyldur að fá samfellda og viðeigandi þjónustu.

Nálgast má nánari upplýsingar á vef Farsældar barna, einnig eru þar skýringar á hugtökum

Samkvæmt lögum nr. 40/2024 um framkvæmdanefnd vegna jarðhræringa í Grindavíkurbæ hefur sveitarstjórn heimild til að fela framkvæmdanefndinni ábyrgð á ákveðnum verkefnum sveitarfélagsins.

Grindavíkurbær nýtti þessa heimild í ágúst 2024 og fól framkvæmdanefndinni Grindavíkurnefnd ábyrgð og framkvæmd lögbundinna verkefna sveitarfélagsins á grundvelli laga nr. 86/2021 um samþættingu þjónustu í þágu farsældar barna.

Þetta þýðir að Grindavíkurnefnd ber nú ábyrgð á skipulagi og framkvæmd þjónustu í samræmi við þessi lög, sem miða að því að tryggja börnum og fjölskyldum samfellda og samþætta þjónustu.

Börn sem eiga lögheimili í Grindavík geta sótt um samþætta þjónustu í þágu farsældar barna hjá þjónustuteymi Grindvíkinga. Þjónustuteymið sér um framkvæmd samþættingar og veitir foreldrum og forsjáraðilum ráðgjöf og stuðning.

Hægt er að sækja um samþætta þjónustu í þágu farsældar barna með því að senda póst á radgjöf@grn.is eða hringja í síma 545-0200

Samkvæmt lögum nr. 40/2024 um framkvæmdanefnd vegna jarðhræringa í Grindavíkurbæ hefur sveitarstjórn heimild til að fela framkvæmdanefndinni ábyrgð á ákveðnum verkefnum sveitarfélagsins. Grindavíkurbær nýtti þessa heimild í ágúst 2024 og fól framkvæmdanefndinni, svokallaðri Grindavíkurnefnd, ábyrgð á framkvæmd laga um leikskóla og grunnskóla.

Það þýðir að Grindavíkurnefnd ber nú ábyrgð á skipulagi og framkvæmd skólamála í Grindavík, en þjónustuteymi nefndarinnar sér um að veita foreldrum og forsjáraðilum ráðgjöf og stuðning í tengslum við skólagöngu barna og ungmenna.

Ákvörðun hefur verið tekin um að ekki verði skólahald í Grindavík skólaárið 2025–2026. Skólaganga barna með lögheimili í Grindavík hefur því verið skipulögð í öðrum sveitarfélögum, í samræmi við ákvæði grunnskólalaga þegar skólastarf í heimabyggð er óframkvæmanlegt.

Hér er hægt að sækja um stuðning vegna skólamála : https://island.is/v/fyrir-grindavik/skolamal